2007年09月14日
(0)又是談兩鐵合併
是一網友的意見
值得一看．．．
原文 — jpoon — 2007-09-14 06:00:31
因為屋企人係地鐵股東，地鐵寄左一本講兩鐵合併既詳細文件。我睇左一半後有以下問題：
1. 負債比率
合併後30/6/2007資本負債比率會由30.8%增至57.7%，雖然董事局話同以往某年度既資本負債比率差唔多 (2002年將軍澳線通車，該年59.3%，2003年55.2%)，但唔好忘記合併後沙中線會即刻上馬，西港島線又話「預期二零零七年展開」，觀塘線延線又審批緊，仲有夢幻之城三期同之後期數又係要融資既，仲有馬鐵、西鐵上蓋地皮等等，究竟地鐵負唔負擔得起咁多呢？呢幾年東涌線同將軍澳支線既地產項目可唔可以幫補到呢？尤其沙中線同西港島線唔似將軍澳線同東涌線咁，好有可能係冇地皮附送的，究竟會對未來幾年地鐵財務帶來幾大負擔呢？因為冇預測數字，所以無人知會點。
2. 預期財務狀況
作為一個老闆，落實每一個項目前，都要睇下預測財務狀況，個項目係咪有錢賺，賺得多唔多，但呢本野冇囉，究竟合併後每年預期收入係幾多呢？每年預期支出係幾多呢？預期每年既負債比率、還款能力、利息支出比率係幾多呢？預期每年盈利係幾多呢？就咁將九鐵同地鐵響2004-2007年既數拼埋一齊係冇意思的，我地根本睇唔到合併後對港鐵既彩務影響。只吹水而冇數字參考亦係冇意思的，我都知有協同效應，但係協同效應對未來盤數有乜影響呢？睇獨立財務顧問果堆野都唔知佢想點既，只係預測鐵路營運既現金流有鬼用咩。我明白要準確預測有困難，但畀個合理既預測，寫明有乜野假設應該都唔難卦？
3. 九鐵貨運業務會有潛在風險
貨運只佔九鐵收入一個好細既比例 (零六年營業額四千四百萬，東鐵同期營業額達三十幾億)，而且貨運業務收入似乎逐年減少，但似乎成本書冇提過政府打算收返紅磡貨場塊地重新發展 (見規劃署網頁 http://www.pland.gov.hk/p_study/prog_s/hungHomSite/site/TC/news.htm)
4. 不合併有乜後果/ 風險
其實呢個先得人驚。咪以為唔合併就即係冇事發生。除左調整票價要過立法會外，最大問題係沙中線何去何從。正如本野所講，於二零零二年政府批左畀九鐵做，如果合併失敗，政府係咪維持原來決定，畀九鐵做返呢？定係畀地鐵呢？如果沙中線真係唔係地鐵做，咁我相信沙中線會係地鐵過海線既一個好強勁既對手，我估九龍塘站、銅鑼灣站、灣仔站、金鐘站同中環站人流會減少，對地鐵既打擊會幾大。當然，我唔知仲會有乜後果同風險，但我覺得董事局應該要交待。
以上只係我個人既少少意見，有錯請指正。
